Havez vua propra senpaga ttteyo
Mea intereso ecitesis da movado, qua prenis multo de mea tempo, pri krear e propagar linguo artificala por internacional skopi. Me savas ke multa filologi desprizas omna tal esforci, ma me forte esas konvinkita ke li eroras e ke ne nur esas posibla, ma absolute necesa, havar artificala, kompozita linguo por omna ta relati interindividua ed interstata, por qui ne existas natural linguo komun ad omna koncernati. Real Nacionar-ligo, la ligo de nacioni quan ni omna esperas, ne povas atingar l'existo, ne povas atingar la funcionado, se lu ne havas komuna moyeno di komuniko komprenat omnaloke, tam en Anglia kam en Francia ed en Holando, en Rumania ed en India, en Japonia ed en Chinia; or la sole posibla, la sole neutra reale e senpartisa linguo por ta relati internaciona esas artifical linguo. Ma ne utilesus havar tal linguo artificala, se ol esus tam neperfekta kam exemple Volapük o mem Esperanto. Ol devas konstruktesar segun principi reale ciencala por esar tote praktikal; e pri co la laboruro facita dum la yari inter 1907 e 1914 dal Idisti, en sua monatal revuo Progreso, montras adavana pazo vere importanta; e la linguo Ido, per ta esforci da kunlaboreri de multa landi, esas atinginta tal grado di perfekteso, ke me ne hezitus konsilar olua adopteso kom la linguo oficiala dil Nacionar-ligo (Tradukuro ek la Angla). - Prof. Otto Jespersen, en diskurso che l'Universitati di London, junio 1920.
Se Esperanto per propagado senegarda o devanco aquirita esus divenonta, dum kelka tempo, ta formo di la linguo (internaciona), quan guvernerii, oficiala institucuri, skoli edc. protektus e favorus, to esus granda e deplorinda retropazo en la voyo vers la realigeso di la mondolinguo. La genio di Zamenhof, di l'eminenta linguo-inventero, unesme kreis la racionala bazo di helpolinguo... ton me tre volunte aceptas... ma Ido implikas plu grandioza plubonigeso en multopla koncerni.
1) La du lingui esas tre facile lernebla, ma Ido esas multe plu facila kam Esperanto. Komparez en Esperanto: la superflua e mem ne-utila adjektiv- e substantiv-flexioni (akuzativo), l'uzadi di adverbo kom adjektivo, la grand amaso de absurda ed arbitrie konstruktita vorti, tante desfacile lernebla, edc.
2) Ido esas multe plu bela. En Esperanto konstanta ed uniforma repetado di -aj, -oj, -ajn, -ojn, chie, chiam, chiom, chiuj, chiujn, chiajn edc.
3) Pro sua plu logikala e diafane klara vorto-derivo e sua tota strukturo, Ido plu akute limitizas nocioni, esas plu distingiva e per to anke plu uzebla ed apta por ciencal e komercala skopo. (Skribita en Ido da Dro P. Renlund, Suedo, experta linguo-pedagogo e poligloto, serioze studiinta, dum duadek e kin yari, plu kam duadek lingui stranjera.)
"Kom artifical produkturo filologiala, Ido superesas Esperanto. Ido esas plu simpla, plu diafana, sociale plu uzebla kam Esperanto" - Prof Schrijen (Utrecht) en la revuo Studiën dil Patri Jezuita, februaro 1921.
"La formi artificala dil derivado en Ido esas linguale e psikologiale plu bona grandaparte, mem kelkafoye multe plu bone selektita kam ti di Esperanto... Me esperas, por l'avantajo ipsa di la Helpo-linguo e lua rapida difuzo, ke balde o tarde l'Esperantisti fondos legifanta societo por enduktar en Esperanto la diversa karakterizivi di Ido." Patro Van Ginneken, S.J. - famoza kom filologo en tota Holando - che la revuo supere nomita.
"Por omna nacioni e precipue por mea Dana sampatriani e por la cetera nacioni Skandinaviana, la linguo Ido certe esas plu facile lernebla ed uzebla kam Esperanto. Pro ico ed anke pro sua ciencala strukturo e per sua granda flexebleso, Ido semblas a me plu apta kam irg altra linguo satisfacar la rolo di linguo helpanta por omna nacioni civilizita." - Otto Jespersen
Interreta adreso di la oficala TTTeyo di Ido: http://members.aol.com/idolinguo/index.html
Havez vua propra senpaga ttteyo