Havez vua propra senpaga ttteyo
En la lasta tempo multa nova mondo-lingui publikigesis. Pos ke le principi di omna mondo-linguo, qua ne volas esar nura ludilo, esas deskovrita, ne esas tre penoza laboro krear irga mondo-linguo. On alteras kelke la finali, kreas kelka nova vorti segun personala gusto, e la nova mondo-linguo esas pronta. Kontre tale tota personala entraprezi oportas sempre stabiligar la principi, sur qui sole la futura mondolinguo povas starar.
Me ne esas teoriisto di nia linguo, ma precize pro to me volas dicar mea opiniono, nam me ya ne defensas sistemo kreita da me.
Semblas a me unesme rimarkiginda, ke nula mondo-linguo povas divenar perfekta, qua esas kreata da un homo. Ne esas posibla, ke un homo savas e memoras omno, quo devas esar atencata, por krear la maxim bona e vere perfekta mondo-linguo.
Pro to on ne povas grande estimar la pretendo di ti, qui kreas mondo-linguo segun sua propra gusto. ...
Altra falsa voyo esas irata en la lasta tempo da inventeri di mondolingui talmaniere ke li intencas tote naturala internaciona linguo. Certe Volapük esis linguo tre artificala, multe tro artificala, ed anke Esperanto havas ankore tro multa artificala elementi, ma la skopo krear tote naturala internaciona linguo ne esas realigebla.
Ni bezonas tote logikoza linguo, qua esez tam reguloza kam la logiko.
Ni bezonas linguo, qua esez preciza expresuro di nia idei.
Segun mea opiniono ica kompleta precizeso esas la maxim grava principo di mondolinguo.
Ke ni prenas kom expresili la elementi di la naturala lingui, facesas por ke la linguo esez tre facile lernebla; ma la precizeso, regulozeso e simpleso esas plu grava kam la naturaleso.
Nur tala tote reguloza, tote logikoza linguo povas lernesar da omna homi di la tero, nam la logiko, la legi di la homala pensado esas sama en la tota tero.
Pro to la linguo-proyekti, qui sakrifikas la simpleso e la regulozeso a la naturaleso, sequas falsa principo.
La naturaleso esas nur moyeno a skopo, ma la skopo esas linguo vere perfekta, tote logikoza, qua expresas sempre la sama ideo per la sama vorto o vort-elemento.
Qua konseque ad ica principi, mustas konfesar, ke nur nia Ido esas en la justa voyo a la ciencala idealo di mondo-linguo.
H.Peus 1911
Interreta adreso di la oficala TTTeyo: http://members.aol.com/idolinguo/index.html
Havez vua propra senpaga ttteyo