Havez vua propra senpaga ttteyo
An la fronto dil natur-defenseri
Forsan, ye l'auroro dil triesma yarmilo,
nova vivo esas pronta organizesar por la homaro.
Yen artiklo pri la ankore poke konocata ekovilaji
En la franca ed en la angla onu skribas: Écovillages, t. e. ekologiala vilaji. Dum la periodo qua sequis 1968, multa experimenti komunesala pri retroiro a vivo en la naturo facesis, ma le plumulta faliis. Tamen esis interesanta suceso inter li, nome la ekologiala vilaji qui ofras la posibleso di maxim granda libereso individuala posibla. La ekologiala vilajo imitas la strukturi dil anciena vilajo, ma hike la homi havas komuna idealo e vivas per olu. En la kustumala vilaji, onu naskis e vivis obligale en ol sen selektis lo e devis subisar min o plu bone la tradicionala vivomaniero ed etiko. En la ekologiala vilaji onu partigas certena aktivesi ed instrumenti. Ito es bona moyeno por sparadar pekunio, energio e tempo. Lo esas sempre plu necesa por vivar bone. Hodie, la materialismo ekonomial nomizita liberala destruktas pokope la kadro sociala di vivala neceseso por la permano dil homi.
Opozite a la soleso quan subisas sempre plu multa homi, kelki serchas itere grupo-vivo. Ma por Westani, qui edukesis favoroze ad individualismo, vivar kun altri esas ofte desfacila. Tamen la ekovilaji esas loki ube onu esforcas kunvivar hamonioze.
La ekovilaji existas depos plu kam 25 yari. Ma erste quar yari ante nun globala organizuro kreesis konseque di internaciona renkontro che la komuneso di Findhorn en Skotia, skope helpar la difuzado dil ekovilaji en la mondo e prizentar oli kom kredebla alternativo di homala developo enkadre di egardita naturo, vice artificala medio urbala o mem moderna rurala.
La ekovilaji esas moderna probo facita da homi qui volas vivar harmonioze inter su e kun la naturo. Li esas la avan-guardo di movemento, qua deziras duriva vivomaniero, e samatempe oli esas tereno di experimentado por idei, tekniki e teknologii nova qui pose eniros la generala socio.
Por atingor ita skopo, necesesas ke existez modelatra komunesi qui povas interkomunikar, ne nur inter su ma kun la cetera socio.
La Globala Reto dil Ekovilaji (GEN) kreskas konstante. Tri regionala centri jacas en Australia (Crystal Waters), en USA (The Farm) ed en Germania (Lebensgarten).
Ica projeti reprezentas ekovilaji ye diversa developo-niveli. La maxim anciena evas plu kam 25 yari e la maxim recenta konstruktesas nun. Multa ek ica projeti konocesas en la tota mondo. Altra projeti, quale olti di est-Europa e mez-Europa, erste komencas existar.
Omna ica vilaji egardas tre serioze la edukado e volas asociar ekologio, spiritaleso, solidareso e kreado di fabrikerii. Singla projeto funcionas quale experimento- e demonstro- centro en sua regiono por propozar aspekti di duriva kolektiva vivado.
Tradukita libere segun recenta libro en la franca linguo: Guide des Alternatives (France et Belgique) t. e. Guidlibro pri Alternativi (Francia e Belgia)
Ica artiklo aparis en la revuo Letro Internaciona # 2 di marto-aprilo 1999
Redaktero: Jean Martignon
12, rue Maurice Utrillo F-91600
Savigny sur Orge
Francia
Interreta adreso di la oficala TTTeyo: http://members.aol.com/idolinguo/index.html
Pri ekovilaji: Le Réseau Français des EcoVillages.
Havez vua propra senpaga ttteyo