Ceud Soiridh, Soiridh Bhuam

[Fonn / Tune]



Ceud soiridh, soiridh bhuam,
Na é hó hao o hó,
Gu strath m'eòlais,
Na hì rì ri rì ó,
O hì ó 's a bhó ro ho,
E hó hao o ho.

'S chun na leitir bheag
Na é hó, [etc.]
Bharraich bhòidhich,
Na hì rì ri, [etc.]

Fàsaidh fochann ann,
Corc' is eòrna,

Fàsaidh peasair ann,
Fàsaidh ponair;

'S binn guth cuthaig' ann,
'S binn guth smeòraich,

'S binn guth na banchaig,
'S meanbh-chrodh òg roimhp',

'S binn guth a' bhuachaill'
'G ualach bhò ann;

'S chì mi am bàta
Falbh gu siùbhlach,

'S i dol timcheall
Rubh' an Dùnain,

'S e mo leannan-sa
Tha 'ga stiùireadh,

Deas-làmh cheanglas
'M ball, 's 'ga lùbadh.