頂你個肺 (這句原來已是粗口!)

作者 : 霑叔
出處 : 東週刊
日期 : 2004

無線電視妹妹仔沙灘裝宣傳新劇集, 舉行煞科記者招待會, 响新界酒店泳池, 照例射水槍, 掟蛋糕嘅老土招式一番.

其中一位妹妹仔, 玩到興起, 一時不察, 爆咗句:"頂你個肺!" 出嚟. 於是成為娛樂版頭條.

事後妹妹仔表白:"我平日都係咁講. 而我一向係唔講粗口嘅!"

切音法改裝粗口

我認為呢位妹妹, 好可能唔知 "頂你個肺" 原來係粗口嚟.

"肺" 乃係呼吸器官, 頂住個呼吸器官, 又點會變粗口呢?

有穿鑿附會, 識少少扮代表兼知少少唔知多多嘅人, 解釋:"肺即係胸, 頂人個肺, 即係頂人個胸, 摸同揸都未夠, 仲要頂, 認真鹹濕! 所以呢句嘢, 係粗口!"

完全冇道理! 絕對似是而非.

"頂你個肺" 係粗口! 不過係另類粗口. 用音韻學上嘅 "切音法" 偽裝過嘅.

"頂你個肺" 前身, 應該係 "頂你嗰'塊height'"!

但係大庭廣眾, 高聲話 "頂你'塊h'", 有時會引起好多不便. 所以對語言音韻最有研究嘅廣東人, 就用 "切音" 方法將佢改頭換面, 等呢句說話, 變成冇咁礙耳.

"切音法" 係乜東東?

即係將兩個字拼埋一個字嚟說. 用第一個字嘅 "首韻", 駁落去第二個字嘅 "尾韻", 反切成一個新音新字出嚟. "塊" 字 "首韻" 係ｆ, height 嘅 "尾韻" 係 ight, 夾埋就係 "肺" (fight) 啦!

另外有句廣東粗話, 亦係咁用 "切音" 嘅. 呢句就係 "挑罅媽" 喇!

有人話:"挑罅媽" 唔合文法!

因為應該 "挑媽罅" 至啱! 咁講亦係一知半解.

個 "罅" 字, 响呢度, 亦係 "反切", 切咗 "你" 同 "亞" 兩字, 變成 "罅" 音. "挑罅媽" 原意係 "挑你亞媽", 與挑伯母身體上之縫隙無關.

用硬音特別有勁

廣東話, 聲韻特多, 造成廣東人對音韻嘅先天敏感. 連粗話, 都係全國各種方言之中, 最有勁道嘅.

從嗰兩個常用動詞 "丟" (dill) 同 "挑" (till), 就睇得出廣東人响音韻學上嘅優勝!

字音之中, 只有兩個 "硬音" (hard sound), 就係Ｄ同Ｔ. 講英文, 動詞過去式, 加 ed, 遇上硬音, 個 ded 或者 ted, 就要讀出嚟 (例如 wanted 和 decided). 廣東人好嘢, 粗口字動詞, 個個音唔揀, 只揀呢兩個 "咬字有咀勁, 吐音有餘韻" 嘅勁音用. 所以聲能致遠, 分分鐘搞到地動山搖咁滯.

因此比英文Ｆ字, 有力好多, 而比起外省同胞方言同類字亦優勝些少. 上海人, 同北方大哥, 個 "操" 字, 弱喇, 冇喱勁道, 大大落在粵語之後.

所以, 我國粗口, 以廣東話為第一. 而其中學問多多, 值得語言學, 方言學, 音韻學, 社會學學者, 深入研究.