| З утварэньнем у сярэдзіне XIII старочча Вялікалітоўскага гаспадарства – Вялікага Княства Літоўскага, яго першы ўладца князь Міндоўг шукаў шляхоў дзеля праўдзівага ўмацаваньня й зацьвярджэньня Вялікага Княства на палітычнае мапе Эўропы. Зьдзяйсьненьне свае мэты Міндоўг бачыў у прыняцьці хрысьціянства, якое магло б адчыніць шлях і да атрыманьня каралеўскае кароны, што, зразумела, моцна падвысіла б палітычны й дыпляматычны прэстыж Літвы ў вачох эўрапэйскіх манархаў-хрысьціянаў. Неўзабаве Міндоўг прымае хрысьціянства: у 1246 року паводле ўсходняга абраду, а ў 1251 – паводле каталіцкага. |
