La luno hike semblas " jacar sur la dorso ", la konocata stelaro desaparas, la polala stelo sinkas plu e plu multe, e fine anke lu desaparas.

On sentas sinkar dop su anciena mondo e videskas nova, vers qua on vehas.

Nun anke por ni la varmegeso divenas preske ne-suportebla, pro to omni metas la lejera tropikala kostumi; ta kostumi tote ne esas komparebla kun la Germana " somerala vesti ", qui esus tro multe pezoza ed impediva en tante granda varmegeso.

La animali komencas esar interesanta hike por la Europano. Ofte fluganta fishi arivas sur la ferdeko di nia navo; ma lore li ne plus povas movar, nam li devas havar starteyo en aquo, de qua li povas departar. Me exemple metis li en sitelo kun aquo, to ja suficas a li. La fluganta fishi havas longeso de cirkume ¼ m. Unfoye on vekigis me por observar multa delfini en la aquo. Me astonesis vidar centi de ca fishi; lia salti esis extraordinare gracioza, nam li adaptas lia korpi a la salto-lineo. Semblas unesme tote ne-versimil ke li saltas tante elegante sen dresado homala, nam li ne nur saltas gracioze, ma anke komune, 6-12 una apud la altra, e to ankore plualtigas la marveloza aspekto.

Pluse, ni konstante akompanesis da nombro de muevegi, qui ya kustumas flugar proxim la navi vehanta sur la maro.

Pos voyajo de du semani eventis mea bapto equatorala. Ico esas kustumo dil navani : omnu qua unesma-foye en la vivo vehas tra la equa toro, baptesas tale ye la maxim stranja tradicionala ceremonii.

Neptun, la deo dil mari, acensas sur la navo, salutas la novico ed examenas lu per serio de questioni. Pos to, kuafisto arivas kun razilo (ligna!), qua havas longeso de 1 metro, e kun aquo-sitelo. Nun la novico razesas per la granda razilo, aquo ek la sitelo e kemialaji nedefinebla, por sparar la tro chera sapono. Ca procedo esas generale plu interesiva, dezirata e joyigiva por ti, qui stacas cirkume e bone amuzas su, kam por ta, qua razesas! Or, omno desagreabla finas, e ye la fino dil bapto equatorala la examenito e razito recevas diplomo, qua prezervas lu de plusa tala bapti ye paso dil equatoro.

Depos tri semani ni neplus vidas tero, e nun ni perceptas la unesma signi de Antarktis. Desagreabla koldeso, kolda ventegi, nivo e grelo. Celita en peliso, on tristete memoras la torida zono, quan on pasis ante un semano.

Segun kalkulo dil komandanto ni devas trovar ni avan Sud-Georgia, 1000 marala mili estale de Kabo Horn... Depos nia departo ni do parkuris 8000 marala mili.

La sequanta nokto esas ventegoza, tale ke ni ne savas quante ni driftis; to esas tre danjeroza, nam la insulo Sud-Georgia esas cirkondata per rifi, qui ofte esas ne-videbla del navo, e quin on perceptas erste kande la navo vehis sur oli.

Pro ke en ca sudala latitudo nur rare vehas navi, anke la voko-signo SOS esas sen valoro. En altra mari kun plu forta trafiko la telegrafale emisita signo SOS advokas preske sempre un o plura navi, qui penas salvar posible maxim multa homi e forsan anke vari de sinkinta o domajita navo.

Ye la proxima matino ni esas en la glacio. Tempope nivas tante dense, ke on povas apene vidar til disto de cent metri. Subite la nebulo e la nivo divenas min densa e dum un kurta instanto tero esas videbla.

Or ta konstato, quankam facita nur dum tre kurta tempo, suficas a la komandanto por la kalkuli. Kande fine la densa kurteno atmosferala separas su, ni vidas jacar avan ni alta montaro de 2700 m, magiala aspekto!

Ol jacas avan ni quale grandioza marvelo, okupanta la tota fronto.

Nun la komandanto audacas serchar la enireyo an la rivo. Ni eniras fyordo e trovas la staciono dil cetacei-kaptanti. Fine, pos longa tempo itere la unesma homala domi!

La staciono havas kelka baraki konstruktita de ondilizita tolo, to esas omno. La domi (quale en fiere nomizas la baraki) esas profunde en la nivo til la tekti, la homi de fore semblas esar nur mikra punti.

La monti dop la homi havas alteso de mil metri.

La insulo, en qua me sejornas, havas longeso de cirkume 160 km e larjeso de cirkum 28 km; ol havas multa konkavesi plena de nivo, evoza glacieri kun danjeroza krevisuri.

La suda rivo ne ja esas explorita, nur poka punti esas indikita en la mapo; kontree la norda rivo esas tote sekura, hike la cetaceikaptanti konstruktis la domi en la fino dil fyordi.

...Ni vidis pinguini e mar-elefanti.

La evoza maro-elefantuli, qui similesas a granda maro-hundi, esas mordema. Se li jacas senmove li havas cirkuma alteso de 1 m e longeso de 4 m. Sur la marelefantala yuni on povas mem kavalkar. La animali esas tre neta, li havas grasa strato de 10 cm. Li povas esar en tre kolda cirkumajo, jacar sur nivo e glacio, kande on tushas lia korpi on perceptas, ke li esass tre varma. Kande on vidas jacar li dum somero, on vidas vaporifar lia korpi; la animali dormas en la glaciala kolda aquo! Lia vivo esas tre interesanta; li havis jaceyo proxim nia staciono e pro to me havis okaziono observar lia vivado ad agado dum tre monati.

La pinguini esas tre simila al homi, simileso qua semblas a ni kelke karikaturatra. Malgre ke li esas uceli, li ne povas flugar,ma vice to li ecenlante povas natar per lia ali, qui esas transformita a natili.

Sur la tero la ponguini havas lenta, ocila marcho-maniero. Li posedas densa plumaro ed anke esas ecelanta e rapida plunjeri. Ulfoye me persequis un; lu plunjis, ed on nur vidis nigra streketo sur la aquo-surfaco; lu retrovenis al surfaco erste pos natir 30m . La animali sidas kune en granda grupi, preske en kolonii. Pro ke li nultempe vidis homi, li anke ne ja konocas la ruzo homala ed esas kurioza e fidanta ye mea viziti. Me furtas la ovi ek la nesto di pinguino; kande ica perceptas la furto, lu iras a vicina nesto, qua jus ne esas okupata, e de ibe furtas la ovi por metar li en la propra nesto e parkovar li!

Me anke manjis la karno di cetaceo. Ol saporas quale mixuro de shinko e fisho, nam la animali ya nutras su per fishi.

Anke la rati ante kelka cent yari importacesis adhike per la navi haltanta hike; li trovas hike ideal nutrivi per la skeleti dil cetacei e maro-hundi, qui sur longa streki kovras la rivo. La vertebrala kolono di tala cetacea skeleto havas cirkuma longeso de 10 m. e diametro de ¾ m, qua lasta esas anke la diametro di ordinar stulo!

La aspekto di tala cetacea skeleto esas pitoreska e belega, ol sempre memorigas la neplus vivanta saurii di anciena epoki pasinta.

Imaginez la aspekto di centi de tala cetacea skeleti grandega, jacanta una apud la altra, kun flava koloro sur la blanla nivo, e sur la altra latero la maro, kantante la eterna melodio dil ondo-ruptado, e super omno la nevarma, ma klare brilanta suno dil Antarktis; forsan on lore obtenas imagino pri la ravisanta beleso dil naturo anke en ca regioni.

...La glacieri formacas blanka-verda glacio-muro en la fyordo, kun la maxim stranja formi; Ofte on kredas konoceskar la maxim stranja statui kreita da homala manui.

Ca muro havas longeso de multa kilometri, ed ol ofras aspekto ravisanta e marveloza!

La natur-marveli di Sud Georgia impresas ofte ne nur la laiko, ma anke la experta voyajanti; tale exemple la granda e famoza natur-exploristo Shakleton esis revisata ed entuziasmigata per la marveli di ta insulo, e lu anke deskriptis oli. Dum la expedicioni al suda polo Shakleton sempre vizitis ca insulo. Ante kelka yari Shakleton mortis ibe en la glacio pro kordio-apoplexio, e lua amiki sepultis lu en ca insulo. Me vizitis la tombo, qua sovaje e romantike situesas avan la maxim alta monto dil tota insulo, la monto Paget. Simpla kruco ligna e kupro-plako kun enskriburo indikas la loko, ube la granda meritoza natur-exploristo reposas. Meze di la glacio e di la montaro, qua esis cirkum lu dum lua vivo, lu dormas por sempre.

R.BUCHARDT 1927