歐遊特輯-行程日記

這裏有我歐遊時所拍的相及行程日記

行程圖片優先睇(可click入放大)

行程日記

22/6　星期二　晴　＜香港－英國＞

　　嘩!終於等到今日啦!不過今日下午我仲未執好行李添!我下午先同位朋友去買"太陽眼鏡"預備去旅行咋!今晚8:30我便去到新機場集合~亞爸亞媽都有來送機!我搭今晚11:45的航機去英國,然後轉機去荷蘭,飛行時間約十二小時!飛行中航機經常遇到氣流問題,加上我一上機便肚痛!所以,一開始我便覺得今次旅程很不順利!我仲擔心自己可唔可以平安抵步英國!結果,我當然係平安到步啦!由於時差問題,去到英國時,只是23/6星期三的早上6:00!

23/6　星期三　晴　＜英國－荷蘭＞

　　今早6:00我便來到倫敦機場!呢個時間好多店都未開!我們全團十五位團友加埋一位領隊便在機場呆等了五個鐘!之後先轉機去荷蘭的首都阿姆斯特丹!在呆等期間,我去了機楊的BODY SHOP買了些日用品,發覺價錢較香港的平好多!另外,我們當中十二位團友在無聊時拿了一張毛毯當檯玩UNO,都可以算是經典,真係好難忘!等了五個鐘,終於可以轉機啦!原來由倫敦飛去荷蘭,只需一個鐘!抵步後我們首先去參觀芝士廠及木屐廠,之後便去看風車,隨後還有福倫丹小漁港映民族服裝相,參觀新教堂,舊教堂,皇宮,性愛博物館,晚上仲去餐館食晚飯!雖然時間不多,但都算節目豐富啦!

24/6　星期四　晴　＜荷蘭－德國＞

　　今日食完早餐後便起程去德國,去到德國華納片場門口食完Lunch後我們便入華納片場玩,我覺得呢度比我上年去美國的環球片場更好玩,加埋同我一齊去的團友都好玩得,我們連給小朋友玩的地方都玩埋,我們又玩兒童過山車,又玩咖啡杯,仲玩得好開心,不過係玩兒童過山車時,我們為了一行十二人可以坐同一架車,要等了數架車才上車,William仲因為咁搞到個小女孩怒視我們,因為個職員我們叫個小女孩坐我們對那架車,個女仔怒視我們的樣子有點恐怖,好彩個女仔玩完過山車之後都好開心,如果唔係.....!我們玩到片場收先走,臨走前仲每人吸個印做紀念添!

25/6　星期五　晴　＜德國＞　

　　噢!今日我要負責做Washing!在巴士團內,每個人都有機會做Washing,Serving同Cleaning的工作,領隊把我們分成了七組,我唔知係幸運定不幸,被安排了同Steven一組(因後來熟落後,知道佢把口好賤,但又好幫得手)!通常隔天我們便有機會要合作,今日無乜特別地方去,只是去了聖哥雅看雀仔鐘同觀賞萊茵河,萊茵河的風景真的很美麗,我們更在路邊茶座嘆Cappucino,晚上我們去到德國的海德堡,這晚的Dinner是肉醬意粉加蘑菰湯,我和Steven足足洗了一個多小時才完成任務!

26/6　星期六　晴　＜德國－瑞士＞

　　今早我們去完海德古堡後便去聖靈教堂,在途中我們遇到遊行示威,在自由時間內,我們在街上食了些地道小食'古巴',味道不錯,晚上我們便去瑞士的琉德本納營地，沿途風景美麗,接近瑞士時,可以看到雪山,營地又對著一條大瀑布,十分'正',當晚我們同領隊一齊預備第二日上雪山的Lunch Box,大家分工合作,形成'生產線'!

27/6　星期日　雨/暴風雪　＜瑞士＞

　　今日我好早就要起身,因為要趕早班車上雪山,臨離開營地前,我仲要去訂'軍刀'同刻名,聽領隊講係軍刀上刻名係瑞士專利的!之後便出發坐火車去少女峰,海拔11333呎,係歐洲最高峰!上到雪山,第一件事我們就係在雪地食午餐,包括三文治,漢堡包,香蕉及橙汁,之後當然係滑雪啦!我咁大個女,第一次滑雪咋!原來在著住雪橇在雪地行,無我想像中咁容易,滑落雪山那刻真係鼓起很大勇氣才踏出,不過整體來講都算好好玩,而且又遇見暴風雪,好難忘!Steven,He-Man,William玩完之後仲變了'笨小孩'添!因為他們的臉都曬黑了,只有戴太陽眼鏡的部分較白,完全係一個笨小孩Look!晚上,我們返到營地享用'芝士火鍋',都算唔錯!

28/6　星期一　晴　＜瑞士－德國＞

　　今日我們一早便坐車去瑞士的琉森參觀垂死的獅子石像,然後便去勞力士錶行,之後有一些自由時間,我們便四圍遊覽,我們去了教堂橋,又去當地郵政局買郵票,之後我們坐車去德國的富山,呢個Camp Site好'正',有一個好靚的湖,而且洗手間的設施亦好好,我們那晚還在湖邊講鬼故,但阿Ben的鬼故其實係咸故,不過佢講得都好好笑!之後好似總有D趣事發生,可惜我唔在場,不過我又唔方便講,Raphael...呵!

29/6　星期二　晴　＜德國＞

　　今早我有機會坐馬車上新天鵝堡,好彩我坐後坐,因為那兩隻馬一路行,一路'方便',Steven同Karen就最明白當中的苦況!在參觀新天鵝堡時,因為我們講野同影相(因為那裏是不準拍攝的),結果職員要警告我們,話要Call Police!Lunch之前我們仲去了鏡湖觀看天鵝!之後我們開車去德國慕尼黑參觀達豪集中營,入到去我們睇了一套電影講當年德國人點對待猶太人,都幾恐怖!之後我們坐車去瑪莉廣場行街,晚上便去食德國鹹豬手同飲啤酒,那晚玩得好開心!Steven可能飲多了,那晚搭車返Camp Site時夠膽在巴士上高唱"超淫的主題曲",引來全車Encore!成為真正的賤人!晚上返到Camp Site遇到另一班學聯的團友,係中學生來的,William同那團的一個女團友Give Me Five時做了真正的鹹豬手,被我們教訓了一頓,所以話,William真係Really淫!

30/6　星期三　晴　＜德國＞

　　今早做Serving時,我覺得個肚唔多舒服,去了數次洗手間及食了些成葯才出發!今日行程係去寶馬車廠同奧林匹克瞭望塔,不過我覺得幾悶,無乜好睇!下午去德意志博物館就真係悶到極點,行完德意志博物館後我已經好口渴,但又無機會買到水飲,辛苦到極,之後我們又行瑪莉廣場,係大家仲係度整緊紀念章的時候,我同Steven因太口渴走了去"麥記"買汽水飲,被大家話我們'鴛鴦戲水(汽水)'!就係咁,開始了我同Steven正式被團友玩的生活!而這晚我們回Camp Site整Dinner時,Jimmy因工受傷,搞到隻手指踵哂!半夜,我的肚痛又發作,好彩有班長陪我去洗手間,整個行程,唯一這晚是很夜我都睡不著,其餘日子我都非常好睡!

01/7　星期四　晴　＜德國－奧地利＞

　　今早去奧地利的薩爾斯堡及莫札特廣場,風景都ok,下午食完Lunch後便去戲水夏宮,聽講係以前皇帝拿來玩貴賓的,今次我們都做了貴賓,個個都濕身!之後我們便去吉斯堡住屋仔,嘩!終於可以有屋仔睡啦!而我就因為肚瀉不能止的關係,仲可以係呢度睇醫生,有得增遊景點,可惜我睇完醫生太早睡,無得參與大家晚上的活動,親身看見大家飲醉的情況,聽說He-Man同Steven就醉得最利害,哈哈!

02/7　星期五　晴　＜奧地利－意大利＞

　　今日好早我便要起身,因為要和Cora,Karen,William,He-Man,May一齊去看草,原來奧地利的草原真係好靚!之後我們食完早餐便去人頭水晶廠,我在這兒都有一些收獲,阿May在這地方發生了意外,佢為了一杯雪糕而弄傷了腳,Jimmy負傷都照顧阿May,實在太令人感動,又發覺領隊一大優點,晚上我們去到意大利威尼斯的Camp Site,今日又輪到我同Steven做Washing啦!呢個Camp Site設施不大好,又多蚊,而且又好熱,係我全程入面最討厭的Camp Site!

03/7　星期六　晴　＜意大利＞

　　今早我們搭水上的士去威尼斯!首先我們參觀聖馬可廣場,然後去看嘆息橋等,我們更在廣場餵白鴿,仲有坐"貢多拉"船仔遊船河!下午Lunch後自由時間我們上了聖馬可教堂鐘樓看風景,在鐘樓往下的威尼斯景好靚,全部的屋仔都係紅色的!返到Camp Site後,我們Book到屋仔住,但一樣係咁熱同多蚊,所以晚上我們數位團友在海邊吹水吹到三時半,為的只是避暑,這樣的吹水,令我對團友又更深認識了!

04/7　星期日　晴　＜意大利＞

　　今早又係我同Steven做Cleaning!一早起身我們便開車去佛羅倫斯,到了下午我們在車上吃完Jimmy的拿手好味"菠蘿腸仔螺絲粉沙律"後便參觀山頂的大偉像!之後,我們下山去參觀皮革廠,大少在皮革廠講粗口,令到Jimmy好唔開心!之後我們去參觀舊教堂時,三人組又不知何故失縱了,搞到我們呆等了很久才去下一景點,一路行都唔覺得呢個地方有乜特別,直至見到聖母之花教堂那刻,便不禁讚嘆這建築物,真的很宏偉!聖母之花教堂是世界三大教堂之一,在教堂的對面有一所天使之門,雕工很不錯,而聖母之花教堂旁是橋托鐘樓,這鐘樓很高,我們行了很久很久才可登上鐘樓頂!咁辛苦上到去,我們都簽名留念,點知都我們簽完後,到William簽時被Security Guard發現,便被迫乖乖的落去!之後,我們便去看古橋,即瓦薩里走廊!跟住便返Camp Site,今晚的Camp Site好正,好似麥理浩夫人渡假村咁,好大,好多設施,仲有泳池添!我同Steven覺得架車經歷了咁多風霜,實在需要打掃,所以係大家玩波的時候,我們默默打掃,原來呢個賤人都唔錯,識得自動自覺打掃,晚上Jimmy帶大家落Disco玩,我同Steven玩了一陣就去了食雪糕,那晚有機會給我們看到流星,真開心!

05/7　星期一　晴　＜意大利＞

　　今早我們去羅馬的鬥獸場,不過我們無入場觀看,而且逗留了很短時間便走!之後便去羅馬廢墟,艾曼紐二世紀念碑,萬神殿,許願泉,西班牙石級等地方參觀,在自由時間內,我們又走了去一間餐館飲Cappucino,之後又無無聊聊咁係石級影了D所謂藝術相,不過效果都唔差,嘻嘻!

06/7　星期二　晴　＜意大利＞

　　今朝一早便去梵蒂岡博物館,我同Karen因為要拍攝錄機的問題,唔覺唔覺便同大家走失了,之後睇了很長時間,都出去的時候才一個一個咁遇見D團友,Lunch之後,我們便去世界最大的教堂-聖彼得大教堂,我同Karen,May,Steven,Raphael仲走上教堂頂看風景,由教堂頂看落去的風景真的很美麗,可惜在這兒的自由時間不足,我們只逗留了片刻便要離去!晚上我們返回佛羅倫斯的Camp Site食意大利的Pizza同肉醬意粉,之後我同Raphael及Steven去了山上睇星星,閃電同吹水!

07/7　星期三　晴　＜意大利－法國＞

　　今日又輪到我做Serving啦!Jimmy叫我們今日要著好D!因為今晚要去摩納哥的蒙地卡羅賭場!今早我們去了比薩看著名的比薩斜塔,我們今天的Lunch又是沙律!之後我們去了香水廠,這兒的貨品包裝和我想像中有點差距,跟住我們便開車去摩納哥,途中我們在一所對海的餐廳享用Dinner,個Feel十分好,晚上我們去到摩納哥的蒙地卡羅賭場,班長那晚贏了千多元法郎!之後,我們欣賞完這兒美麗的夜景後,便返Camp Site,今晚的Camp Site好恐怖,個Feel絕對係唔好,而且男女是共用一個洗手間及沖涼房,不大方便!

08/7　星期四　晴　＜法國＞

　　今日可以話係全程旅行最寫意的一日,我有機會係法國的石灘游泳,好正啊!之後我們開車去小鎮阿富隆參觀教皇皇宮,由於班長在摩納哥贏了錢,便請我們在路邊茶座食雪糕及冷飲,好正!晚上返到Camp Site,我們便吃最後晚餐,因為我們食埋呢餐便不用再食Jimmy整的Dinner啦!

09/7　星期五　晴　＜法國＞

　　今早我們去坐車去里昂時,因道路改道關係,我們的車好像迷路了,我們都擔心能否在預期時間轉搭世界最快的TGV子彈火車去巴黎!最後,我們在中途下了車,轉搭地鐵去轉車!坐完那架TGV火車後有點失望,因感受不到火車的速度有多快!去到巴黎,就當然要上去巴黎鐵塔啦!不過上到巴黎鐵塔看風景時,覺得沒有什麼靚風景可以看!這晚,我們開始有酒店住,唔駛再睡在巴士上,我們的酒店在巴黎市郊,可能大家習慣了住Camp Site,成日錯口話返Camp Site,其實係返Hotel先至真,就連Jimmy都試過叫錯了!

10/7　星期六　雨　＜法國＞

　　今日一早我們便去參觀羅浮宮,我有機會看到蒙羅麗莎那幅畫!可能去得太多博物館,開始對這些宏偉雕塑麻木了,睇完羅浮宮之後,我們便去遊覽"老佛爺"百貨公司,在自由時間內,我們四圍行,都無買到些什麼!最大收穫的應該係班長同Sharon,因為他們買了不少貨品,聽說較香港的便宜很多!之後我們便去聖母院參觀,聖母院前有一位置是法國的中心點,我們便個個指住個中心點影相!那晚我們去食法國蝸牛,食完法國蝸牛後,我同May,Steven,班長,Sharon都跟Jimmy先返酒店休息,其餘團友便去了遊夜景,後來我們先返酒店的知道當晚近我們的地鐵站因事封了,便擔心他們何時回來,結果等到凌晨12:45,第一架的士回來了,但第二架的士則要等到凌晨1:30才回來,原來那架的士司機亂兜路,結果迷路了,最後返到酒店的車費要三百多元,因迷路是司機的責任,所以最後用一百元便可下車,聽講過程中最High的團友係Cora,佢完全無擔心過有什麼危險!

11/7　星期日　雨　＜法國＞

　　今早的行程是參觀凡爾賽宮同埋它的後花園,凡爾賽宮沒有什麼東西好看,而後花園雖然環境不錯,但吸引力亦不大!食完Lunch後,我們便去看新凱旋門,之後才去凱旋門,在自由時間內,我們又在香榭麗舍大道的路邊茶座食雪糕及冷飲!之後四圍行街影相,準時六時返回車上,一上車出面便下大雨,那些遲到的團友都被淋濕!晚上我們便去塞納河遊船河,我在船尾拍到看到日落,好靚!之後我們便夜遊巴黎鐵塔,然後我們去了買團衣,最後決定買了件"煙花"團衣,之後我們便夜遊凱旋門,回程時,Jimmy便向我們收導遊費!

12/7　星期一　晴　＜法國＞

　　今早我們都著了團衣一齊去狄士尼樂園玩,我們的Look引來不少目光的注視!由於人多的關係,我們只能玩了數款機動遊戲,而且這裏的機動遊戲不及華納片場的刺激,所以大家對這兒的評價都不大好!我們玩完機動遊戲後,便四圍走,希望找些有趣的東西,最後我們一齊去吊橋玩!晚上我們去了這裏的Planet Holleywood食Dinner,之後再返入去睇煙花,今晚給我找到一個好位,可以係狄士尼樂園近距離睇煙花,真係好難忘!

13/7　星期二　晴　＜法國－英國＞

　　今早我們很早便去戴高樂機場,由於飛機Delay了,我們在機場呆等了三小時多才搭飛機去英國倫敦!之後便入住酒店,安頓了後便搭地鐵去唐人街食Dinner!之後我們去Sega World,Jimmy表演玩跳舞機,之後再去Soho區參觀!

14/7　星期三　晴　＜英國＞

　　今日我們要跟另一團學聯的團友一齊觀光,那位領隊帶我們去白金漢宮,然後便去遠眺大笨鐘,國會大樓,泰晤士河以及倫敦塔橋,之後便去遊覽聖保祿大教堂!下午我們返酒店休息了一會便去參觀蠟像館!到了晚上便去夜遊塔橋!

15/7　星期四　晴　＜英國＞

　　今早起身同Karen,He-Man,Steven,May,亞哥,亞妹去牛津街行街買衫,因為之前約了Jimmy在唐人街等然後食Lunch,但差不多夠鐘時我們都未起行,我同Steven本來諗住早D過去找Jimmy,但點知被亞哥,亞妹指錯了方向,行了去另一地方,我們將錯就錯,便兩個自己去了行街,我們行了倫敦三間Body Shop,試盡那些貨品,到最後一間先至買,之後我們買了地道的炸魚薯條當Lunch!然後返酒店拿行李走,去希斯路機場搭飛機返香港,入到機場後,發覺機場內的Body Shop價錢更平,因為免稅,平均Less 15%!

16/7　星期五　晴　＜英國－香港＞

　　終於返回香港了,臨離開機場前,我們都影埋剩餘的菲林!就係咁,我呢個廿五日歐洲之旅便結束啦!真係有D唔捨得!

資料來源:
1.史提芬.利雲熱線之進攻歐洲
2.Mandy的超強記憶大腦